ياپونىيەنىڭ نۆۋەتچى رەئىسلىكى ئاستىدا چاقىرىلغان 2023 – يىللىق يەتتە دۆلەت گۇرۇھى باشلىقلار يىغىنى خىروشىمادا باشلاندى.
باش ۋەزىر كىشىدا فۇمىئونىڭ ساھىبخانلىقىدا ئۈچ كۈن داۋاملىشىدىغان باشلىقلار يىغىنىغا ئامېرىكا، فىرانسىيە، ئەنگلىيە، گېرمانىيە، كانادا ۋە ئىتالىيە رەھبەرلىرى قاتناشتى؛ بۇ قېتىمقى يىغىنغا يەنە يەتتە دۆلەت گۇرۇھىغا ئەزا بولمىغان ياۋروپا ئىتتىپاقى، ھىندونېزىيە، ھىندىستان، جەنۇبىي كورېيە، ئاۋسترالىيە ۋە ۋىيېتنام قاتارلىق تەشكىلات ۋە دۆلەتلەرمۇ تەكلىپ قىلىندى.
ساھىبخان دۆلەت ياپونىيەنىڭ باش ۋەزىرى كىشىدا فۇمىئۇ بىلەن رەپىقىسى كىشىدا يۇكو خىروشىما تىنچلىق خاتىرە مۇزېيى ئالدىدا مېھمان دۆلەتلەرنىڭ دۆلەت ۋە ھۆكۈمەت باشلىقلىرىنى كۈتۈۋالدى.
ئاتوم بومبىسى تاشلانغان 1945- يىلىغا تەۋە 100 مىڭدىن ئارتۇق ئاسارە- ئەتىقە ۋە يادىكارلىقلار كۆرگەزمە قىلىنىۋاتقان مۇزېي يەتتە دۆلەت گۇرۇھى رەھبەرلىرىنىڭ كوللېكتىپ ھالەتتىكى تۇنجى قېتىملىق زىيارىتىگە سەھنە بولدى.
ئەر – ئايال كىشىدالارنىڭ ھەمراھلىقىدا، ئامېرىكا پىرېزىدېنتى جو بايدىن بىلەن رەپىقىسى جىلل بايدىن قاتارلىق مېھمان رەھبەرلەر ۋە ئۇلارنىڭ رەپىقىلىرى تارىخىي مۇزېي ۋە ئۇنىڭ ھويلىسىنى ئېكسكۇرسىيە قىلدى.
زىيارەتتىن كېيىن، رەھبەرلەر مۇېينىڭ ھويلىسىدىكى ئاتوم بومبىسىنىڭ زىيانكەشلىكىگە ئۇچرىغۇچىلارغا بېغىشلاپ ياسالغان مەقبەرىگە گۈلچەمبىرەك قويدى.
بايدىن 1945- يىلىدىكى ئاتوم بومبىسى ھۇجۇمىدىن كېيىن ۋەزىپە ئۆتەۋېتىپ خىروشىماغا بارغان ئىككىنچى ئامېرىكا پىرېزىدېنتى بولۇپ قالدى. 2016- يىلى باراك ئوباما خىروشىمانى زىيارەت قىلغانىدى.
يەرشارى خاراكتېرلىك سىياسىي ۋە ئىقتىسادىي مەسىلىلەرنى ھەل قىلىشنىڭ مۇھىم خەلقئارالىق سۇپىلىرىنىڭ بىرى دەپ قارىلىدىغان يەتتە دۆلەت گۇرۇھى باشلىقلار يىغىنى «چوڭ شاھزادە خىروشىما مېھمانخانىسى»دا ئۆتكۈزۈلىدۇ.
ئامېرىكا قوشما ئىشتاتلىرى 1945- يىلى 6 – ئاۋغۇست خىروشىماغا، 9- ئاۋغۇست ناگاساكىغا ئاتوم بومبىسى تاشلاپ، 210 مىڭغا يېقىن ئادەمنىڭ ئۆلۈشىنى كەلتۈرۈپ چىقارغانىدى.
