خىتاي ئاگېنتلىقى شىنخۇانىڭ خەۋىرىدە قەيت قىلىنىشىچە، شى جىنپىڭ خىتاينى زىيارەت قىلىۋاتقان رۇسىيە باش مىنىستىرى مىخايىل مىشۇستىن بىلەن بېيجىڭدا كۆرۈشكەن.
شى جىنپىڭ خىتاينىڭ رۇسىيە خەلقىنىڭ ئۆزى تاللىغان تەرەققىي قىلىش يولىدا مېڭىشىنى قوللايدىغانلىقىنى ئەسكەرتىپ: «خىتاي-رۇسىيە مۇناسىۋەتلىرىنى داۋاملاشتۇرۇش ۋە تەرەققىي قىلدۇرۇش، ئىككى دۆلەت خەلقلىرىنىڭ ئاساسلىق مەنپەئەتلىرى ئۈچۈن ئىستراتېگىيەلىك تاللىشى ھېسابلىنىدۇ» دېدى.
شى جىنپىڭ بۇ يىل (2023) نىڭ بېشىدىن بۇيان پىرېزىدېنت ۋلادىمىر پۇتىن بىلەن ئىككى قېتىم كۆرۈشكەنلىكىنى خاتىرىلىتىپ، ئىككى دۆلەتنىڭ ھۆكۈمەتلەر ئارا، قانۇن چىقىرىش ئورگانلىرى، سىياسىي پارتىيەلەر ۋە يەرلىك ھۆكۈمەتلەر سەۋىيەسىدە يىغىنلارنىڭ ئۇيۇشتۇرۇلغانلىقىنى، بۇ سايىدا ھەرىكەتچان ھەمكارلىقلارنىڭ تەرەققىي قىلدۇرۇلغانلىقىنى بىلدۈردى.
شى جىنپىڭ رۇسىيە-خىتاينىڭ 2023-يىلى ئۈچۈن نىشان قىلغان 200 مىليارد دوللارلىق سودا ئومۇمىي سوممىسىغا 11 ئايدا يەتكەنلىكلىرىنى ئەسكەرتىپ، بۇنىڭ ئىقتىسادىي ھەمكارلىقلارنىڭ يوشۇرۇن كۈچىنى ئوتتۇرىغا چىقارغانلىقىنى تەكىتلىدى.
ئامېرىكا بىلەن گېئو ئىستراتېگىيەلىك رىقابەت ۋە رايون خاراكتېرلىك يىرىكچىلىك كۈچىيىۋاتقان مەزگىلدە، خىتاينىڭ ئۇكرائىنادىكى ئۇرۇش سەۋەبىدىن ئوخشاش مەيدانغا ئىگە رۇسىيە بىلەن ھەمكارلىقلىرىنى كۈچەيتكەنلىكى دىققەت قوزغىماقتا.
بېيجىڭ ھۆكۈمىتى ئامېرىكا بىلەن ياۋروپانىڭ ئېمبارگولارغا قارشى رۇسىيەنى قوللىماسلىق توغرىسىدىكى ئاگاھلاندۇرۇشلىرىغا قارىماي، موسكۋا بىلەن ئېنېرگىيەنى ئاساس قىلغان ھالدا ئىقتىسادىي مۇناسىۋەتلىرىنى داۋاملىق تەرەققىي قىلدۇرماقتا.
