ئەنگىلىيە باش مىنىستىرى سۇناك: خىتاي دۇنيا تەرتىپىگە قارشى چىقماقتا

ئەنگىلىيە باش مىنىستىرى رىشى سۇناك ئەنگلىيەنىڭ «ھوشيارلىقنى ئۆستۈرۈشى كېرەك» لىكىنى، خىتاينىڭ دۇنيا تەرتىپىگە خىرىس قىلىۋاتقانلىقىنى ئېيتتى.

ئامېرىكىدا تۇرۇۋاتقان Rishi Sunak BBC گە بايانات ئېلان قىلىپ ، ئاۋسترالىيە-ئامېرىكا-ئەنگلىيە ئوتتۇرىسىدىكى AUKUS بىخەتەرلىك كېلىشىمىنىڭ تەپسىلاتىنى مۇزاكىرە قىلىۋاتقانلىقىنى بىلدۈردى.

سۇناك قوراللىق قىسىمغا ئاجرىتىلغان خامچوت توغرىسىدا مۇنداق دېدى: «دۇنيا تېخىمۇ تۇراقسىز جايغا ئايلاندى ، بىخەتەرلىكىمىزگە تەھدىد كۈچەيدى».

كەلگۈسى ئىككى يىلدا ئەنگلىيەنىڭ مۇداپىئە خامچوتى 5 مىليارد فوندستېرلىڭ ئەتراپىدا ئاشىدۇ.

ئەنگىلىيەنىڭ ياۋروپادىكى مۇداپىئە ئىشلىرىغا ئەڭ كۆپ خامچوت ئاجرىتىدىغان دۆلەت ئىكەنلىكىنى بايان قىلغان سۇناك: «بۇ يەنىلا شۇنداق بولىدۇ» دېدى.

يېقىنقى سانلىق مەلۇماتلاردا كۆرسىتىلىشىچە ، ئەنگىلىيە دۆلەت ئىچى ئىشلەپچىقىرىش ئومۇمىي قىممىتىنىڭ 2 پىرسەنتىنى مۇداپىئە ئىشلىرىغا سەرپ قىلغان.

سۇناك سۆزىنى داۋاملاشتۇرۇپ مۇنداق دېدى: «خىتاي بىزنىڭ قىممەت قارىشىمىزغا ئوخشىمايدىغان ، دۇنيا تەرتىپىگە خىرىس قىلىدىغان دۆلەت. شۇڭلاشقا بىز ھوشيارلىقنى ساقلاپ ، ئۆزىمىزنى ، قىممەت قارىشىمىزنى ۋە مەنپەئەتىمىزنى قوغداشقا ھوقۇقلۇق».

ئەنگىلىيە ھۆكۈمىتىنىڭ خىتاي پەيدا قىلغان بۇ «مەسىلىگە» ئەستايىدىل مۇئامىلە قىلىدىغانلىقىنى بايان قىلغان سۇناك ، ئۇلارنىڭ خىتاينىڭ «يېرىم ئۆتكۈزگۈچ» قاتارلىق ساھەلەرگە مەبلەغ سېلىشىنىڭ ئالدىنى ئالىدىغانلىقىنى ئېيتتى.